ILI UFANIKIWE KAMILISHA JAMBO MOJA NDIPO UANZE LINGINE

NI siku nyingine tena ambayo Mwenyezi Mungu ametuamsha tukiwa wazima na wenye afya njema. Karibu mpenzi msomaji katika safu hii ya Maisha Yetu inayokujia kila alhamisi kwa lengo la kukuelimisha na kukuadilisha.
Kumbuka, katika maisha hakuna njia ya mkato ya mafanikio. Mafanikio yoyote yana gharama kubwa. Uwezekano wa kufanikiwa upo, thawabu ipo lakini mpaka uwe na uhitaji huo. Ili ufanikiwe, yakupasa ufanye kazi kwa bidii, kwani ni muhimu kujishughulisha na kitu unachokipenda na kuongeza ujuzi wa kufanya kazi yako kwa ubora unaotakiwa.
Siri nyingine ya mafanikio katika maisha ni uaminifu, kwa maneno mengine tunasema, uaminifu ni siri ya mafanikio. Kama utakuwa mwaminifu, utaaminiwa. Ina maana utakuwa mwaminifu katika shughuli zako zote unazozifanya.
Hata katika maeneo ya kazi, kila mwajiri hupenda kujua tabia za wafanyakazi wake, kila mmoja uaminifu wake ulivyo. Ina maana kuwa mwajiriwa yeyote asiyekuwa mwaminifu hatapata nafasi ya kupandishwa daraja katika eneo lake la kazi.
Hata marafiki zako watakapogundua wewe siyo mwadilifu, hawatakuwa tayari kufanya kazi nawe. Utaheshimika na wenzako pale tu watapogundua kuwa ni mtu uliyemwadilifu. Watu wengi wamekuwa na tabia mbaya na kuwasababishia uharibifu katika maisha yao kwa kukosa uaminifu.
Wanaibua matumaini kwa wengine kwa ahadi huku wakijua kuwa hawawezi kuzitimiza. Kufanya hivi ni kutenda kosa lisilosameheka na kutokuwa na adabu kwa wenzako. Mtu mwenye busara huelewa tokea mwanzo kuwa, uaminifu ni sera nzuri katika maisha. Na unaweza kufanya mambo mengi mazuri kutokana na uaminifu huo, tofauti na mtu asiyemwaminifu.
Kumbuka kuwa mtu aliyefanikiwa amepata digrii ya uaminifu katika maisha yake. Mbali na uaminifu suala la kuzingatia ni nidhamu. Hiyo ni moja ya tabia muhimu katika kupata mafanikio yako.
Mwimbaji mmoja aliwahi kuimba – ‘nidhamu ya kazi ni msingi wa mafanikio mema kazini’. Mtu binafsi anapaswa kuwa na nidhamu vile vile taifa zima. Pasipo nidhamu dunia inaweza kutetereka.
Kipindi cha vita kuu ya dunia, Uingereza isingeweza kustahimili mabomu ya kila siku kama watu wake wasingekuwa na nidhamu. Wakazi wake walikwenda kujihifadhi kwenye makazi ya muda wakati wa usiku bila kujua kuwa nyumba zao zitasalimika asubuhi inayofuata. Lakini waliendelea kuishi. Hiyo ni nidhamu. Hakuna vita itakayoweza kufanikiwa mpaka kuwepo na nidhamu.
Hakuna kampuni itakayofanya vizuri hadi pale wafanyakazi wake watakapokuwa na nidhamu. Nidhamu inaleta Umoja, nguvu, ushupavu na mafanikio. Katika kufikia mafanikio yako ni vema kufanya kitu kimoja kwa wakati. Baadhi ya watu wamekuwa hawawezi kukamilisha jambo lolote wanalolianza.
Kwa sababu wamekuwa wakijihusisha na miradi mingi lakini yote imekuwa haikamiliki. Hii ni kwa sababu hawashikamani na jambo moja kwa wakati na kulikamilisha. Huu ni ukosefu wa nidhamu. Ukamilifu wa malengo huleta furaha. Kukamilisha mipango yako kunakupa ujasiri wa kufanya kitu kingine kikubwa zaidi, ambacho ni kizuri.
Watu waliofanikiwa kukamilisha vitu vingi na kupata mafanikio ni wale wanaofanya jambo moja kwa wakati na kulikamilisha halafu wanaanza kufanya jambo lingine. Huu ni mpango mzuri, pia ni nidhamu.
Weka maisha yako katika mpangilio mzuri kwa namna ambayo muda wako utatumika kwa manufaa mazuri. Fanya kazi muhimu sasa, vitu vya kawaida vitasubiri. Kazi unayoianza hakikisha unaifanya mpaka inakamilika. Kwa kufanya hivyo utazuia kuchanganyikiwa. Fanya kitu kimoja kwa wakati na ukifanye sasa.
Unaweza kufanikiwa mara nyingi kadiri unavyoiweka akili yako kufanikiwa. Kila kazi au uzoefu unaoupata ni somo muhimu kwa maisha, kwa kila ujuzi unaoupata ni vema ukautumia kwa mafanikio ili kukamilisha malengo yako.
Ni vyema kuonyesha shukurani. Kamwe usilaumu kila kitu. Maneno mazuri huongeza nguvu na uhai na kukufanya kusonga mbele katika shughuli zako. Toa shukurani kwa ajili ya maisha yanayokuzunguka, shukuru kwa mambo yote unayoyapitia katika maisha yako, shukuru kwa ajili ya kazi uliyonayo na vikwazo vyote unavyovipitia.
Shukuru kwa ajili ya familia yako na marafiki kwani pasipo wao usingeyafurahia maisha yako. Onyesha shukurani kwa vitu vizuri vya asili, kama vile milima, maziwa, miti, maua, ndege na wanyama. Kufanya hivi ni kushukuru kwa maisha yako na vyote vinavyokuzunguka.
Ijaze nyumba yako shukurani, kamwe usizungumzie mambo yanayokurudisha nyuma nyumbani kwako, wakati unazungumzia umaskini na upungufu, unafungulia milango ya vitu hivyo na kuvikaribisha katika maisha yako.
Kuwa na mawazo ya upendo, afya, furaha, mafanikio na shukrani kwa yote unayokabiliana nayo. Kamwe usiseme kuwa fedha ni adimu au maisha ni magumu. Zungumza mafanikio, fikiri mafanikio na toa shukrani kwa mafanikio uliyonayo katika maisha yako.
Kama unataka kufanikiwa, jifunze kuwashukuru wengine. Katika shughuli mbalimbali, mafanikio yanategemea mchango unaoupata kutoka kwa wengine.
Inaweza kutokea kuwa kikwazo pekee katika mafanikio yako ni mtu fulani. Hivyo ni muhimu kujenga tabia ya shukrani kwa wengine. Kila mmoja anapenda shukrani. Endapo unapenda kuwa na mafanikio yasiyokoma ni vema ukajifunza kupenda wengine, kufurahia vipaji walivyonavyo na kuzungumza nao.
Kila mmoja anamwitaji mwenzake katika mafanikio yake. Kila mmoja anahitaji msaada wa mwenzake. Muuzaji anahitaji mnunuzi katika biashara zake. Kama mfanyabiashara hatapata watu watakaonunua bidhaa zake, hatafanikiwa.
Mkurugenzi anahitaji utegemezi wa wafanyakazi wake ili vitu viende vizuri. Bila msaada wao, atashindwa kufanya kazi zake. Wanasiasa wanahitaji msaada kutoka kwa wapigakura wao. Bila msaada wao hawataweza kuchaguliwa. Siri ya mafanikio katika maisha yetu ni kwamba, kila mwanadamu anahitaji kuheshimu wengine na kuheshimiwa. Hili ni la msingi.
Kwa vyovyote vile unaposhughulika na watu wengine, uweke akilini kuwa shukrani ni jambo la msingi. Kwa kujua hili litakuweka katika wakati mzuri unaposhughulika na watu katika shughuli zako.
Wafanye wengine wajisikie wao ni wa maana kwa kukumbuka majina yao, kwa kuwatambulisha kwa heshima na kuomba ushauri kutoka kwao. Watambulishe wengine kwa mavazi yao, vyeo na jinsi wanavyofanya kazi.